Njoftime

KLSH pjesë në konferencën Young EUROSAI në Londër

14.11.2019

Në bazë të suksesit të Konferencës së parë të Young EUROSAI të zhvilluar në Roterdam në nëntor të vitit 2013, audituesit e rinj në mbarë Europën iniciuan një praktikë të vazhdueshme të shkëmbimit të eksperiencave me njëri-tjetrin. Vizioni ishte që të organizohej një Konferencë që i jep përfaqësuesve të Institucioneve Supreme të Auditimit (rreth 35 vjeç e poshtë) mundësinë për të shkëmbyer ide dhe zgjidhje të reja për sfidat me të cilat përballen Institucionet Supreme të Auditimit, sot dhe në të ardhmen.

Për vitin 2019 Konferenca Young EUROSAI u zhvillua në Londër në datat 5-8 Nëntor. Tema e përzgjedhur për këtë vit ishte “Relevanca”. Arsyeja e zgjedhjes së kësaj teme nga organizatorët lidhet me kushtet në të cilat veprojnë Institucionet Supreme të Auditimit.

Sot karakterizohemi nga rrjedhja e shpejtë e informacionit, ndërkohë që kushtet teknologjike, sociale dhe politike janë në ndryshim të vazhdueshëm dhe automatikisht edhe SAI-t duhet t’i përshtaten këtyre ndryshimeve.

KLSH u përfaqësua nga Z.Azmi Stringa, Drejtor Departamenti, Znj.Eriola Hoxha, Audituese dhe Znj.Erjola Meçaj, Audituese.

Gjatë Konferencës, audituesit pjesëmarrës së bashku me Organizatorët eksploruan sfidat që SAI-t përballen sot duke ndarë praktika, projekte dhe inovacione për zgjidhjet kryesore të secilit Institucion në mënyrë që të vazhdojnë të mbeten relevante.

Në ditën e parë të Konferencës, datë 5 Nëntor, të ftuarit në panel ishin:
-Lord Bichard KCB, i cili pas fjalës përshendetëse në Konferencë ndau disa njohuri duke e vënë theksin në rëndësinë që secili SAI duhet të ketë për të marr parasysh ndryshimet në shoqëri gjatë punës audituese.
-Meg Hillier, foli për rolin kritik të Parlamentit në Mbretërinë e Bashkuar që nuk ka qenë kurrë më i rëndësishëm se në këto kohë sfidash për ecurinë politike dhe ekonomike.
-David Hencke paraqiti një tablo interesante të ndryshimeve më të fundit, vecanërisht të NAO.
-Gareth Davies ndau perspektivën e tij unike si Kontrollues dhe Auditor i Përgjithshëm i sapoemëruar mbi sfidat e ardhshme në fushën e auditimit.
-Nik Kirby foli për rëndësinë e besimit të publikut, demokracisë dhe kuptimin e zyrtarit publik me integritet.
-Presidenti Seyit Ahmed Baş, Kryetar i Gjykatës së Llogarive të Turqisë i cili gjithashtu mban dhe pozicionin e  drejtuesit të EUROSAI-t, ndau sfidat e përbashkëta për SAI-t dhe theksoi qëndrimin e duhur për çështjet në zhvillim në matjen e cilësisë së auditimit.

Në ditën e dytë të Konferencës, datë 6 Nëntor, audituesit pjesëmarrës u ndanë në grupe për të punuar në Workshop-e sipas temave të përzgjedhura që gjatë fazës së regjistrimit si pjesëmarrës në Konferencë.
Përfaqësuesit e KLSH ishin pjesëmarrës në Workshop-et e mëposhtme:
Workshop: Ndikimi i SAI-ve, si mund të bëhemi ndikues?

Lituania dhe Izraeli drejtuan këtë seancë ku hulumtuan mënyrat për të ndihmuar në rritjen dhe shpërndarjen e informacionit si dhe përcaktimin e identitetit dhe vlerave të SAI-ve, duke përshtatur mesazhe për grupe të ndryshme të interesit. 
Ata gjithashtu sugjeruan përdorimin e grafikëve dhe zhvillimin e raporteve më të shkurtër.
Workshop: Si munden SAI-t të qëndrojnë relevante  me ndryshimet e legjislacionit?

Përfaqësuesit e Kroacisë ndanë njohuri të tilla si ata auditojnë financiarisht partitë politike dhe ndajnë gjetjet sipas vlerave të tyre në raport me paratë dhe me Parlamentin.
Workshop: Inovacionet në auditimet e partive politike
Spanja solli si inovacion sistemin e auditimit të partive politike si një proces solid për mbledhjen e të dhënave.
Workshop - Liberalizimi i parimeve të auditimit

Ky workshop u prezantua nga Bjellorusia ku ata shpjeguan parimet e tyre të auditimit dhe se si përfshijnë organizatat publike dhe private. Një nga zgjidhjet e prezantuara ishte dhënia e mundësisë organeve të audituara për përmirësim përpara penalizimit.

KLSH u përfaqësua duke prezantuar dhe drejtuar Workshop-in me temë “Rëndësia e auditimit të BIG DATA (të dhënave të mëdha)” e cila u prezantua nga Drejtor i Departamentit Z.Stringa. 

Prezantimi përmbante:

-Një prezantim i përgjithshëm i SAI-t të Shqipërisë
-Auditimi dhe raportimi për Ekzekutimin e Buxhetit të Shtetit
-Përmbledhje e Ekonomisë dhe Buxhetit të Shtetit Shqiptar
-Çështjet kryesore në Ekzekutimin e Buxhetit të Shtetit
-Roli i Big Data në auditimet e KLSH, ku u prezantuan 3 raste studimore:
-Përdorimi i Big Data në auditimin e Ekzekutimit të Buxhetit të Shtetit
-Përdorimi i Big Data në auditimin e Procedurave të Prokurimit
-Përdorimi i Big Data në auditimin e Fondit të Sigurimeve Shëndetësore.

Z.Stringa me rastet praktike tregoi për përfaqësuesit e SAI-ve pjesëmarrës në këtë workshop se si auditimi i mbështetur në analitikën e të dhënave, po ndryshon mentalitetin dhe metodologjinë tradicionale të auditimit duke identifikuar zonat me risk të lartë në mënyrë që të mbyllen boshllëqet për abuzim dhe si u përdorën me sukses Big Data-t për të audituar Buxhetin e Shtetit, pa të cilat do të ishte e pamundur arritja e auditimeve të suksesshme dhe analiza e veprimtarisë mashtruese si një mënyrë thelbësore për të siguruar që auditimi mbetet efektiv. U theksua nevoja e trajnimeve të vazhdueshme, trajnime të cilat KLSH u ka kushtuar një vëmendje të vecantë për të siguruar rritjen e kapaciteteve audituese dhe aftësisë së njerëzve për të përdorur këto të dhëna.

Përdorimi i të dhënave të mëdha në auditimin e Buxhetit të Shtetit ka provuar të ketë vlerë të shtuar nisur nga rezultatet e arrira dhe aktualisht KLSH është duke punuar në zgjerimin e përdorimit të dhënave të mëdha në fushat e tjera të auditimit.
Në ditën e tretë dhe të fundit të Konferencës  pyetjet e ngritura gjatë zhvillimit të workshop-eve morën përgjigje dhe Audituesit e SAI-t u bënë më të qartë në lidhje me misionin e tyre për të përballuar sfidat e së ardhmes.

Nëpërmjet “brain storming” në këtë Konferencë u identifikuan sfidat më të rëndësishme me të cilat përballen sot Institucionet Supreme të Auditimit si dhe zgjidhjet ndaj tyre:

1. Si mund Institucionet Supreme të Auditimit të qëndrojnë të rëndësishme për audiencën e tyre?
SAI-t duhet të marrin në konsideratë se kush është audienca e tyre dhe cilat janë karakteristikat unike të një Institucioni Suprem Auditimi që e bëjnë atë të rëndësishëm. Hipoteza jonë fillestare na ka shtyrë të përcaktojmë audiencën tonë: qeverinë, median dhe publikun. Karakteristikat unike të një Institucioni Suprem të Auditimit janë se ai është i pavarur, transparent dhe i besueshëm.

2. Si mund të sigurojnë Institucionet Supreme të Auditimit pavarësinë e tyre nga presionet e publikut, mediave dhe qeverisë?
Liria për të dhënë gjykime të balancuara dhe të pavarura të auditimit është ajo që e bën rolin e Institucionit Suprem të Auditimit kaq të veçantë. Në kohët tona moderne, nevoja për një vlerësues të drejtë, të ekuilibruar dhe të pavarur bëhet gjithnjë e më thelbësore. Që gjykimet e auditimit të jenë relevante, të besueshme dhe efektive, ato duhet të jenë të lira nga ndikimi i jashtëm.

3. Si mund të sigurojnë Institucionet Supreme të Auditimit që puna e tyre të besohet në vazhdimësi nga publiku, media dhe qeveria?
Debati rreth 'lajmeve të rreme' ka sjellë një rritje të mosbesimit ndaj burimeve të informacionit dikur shumë të besueshëm. Institucionet e larta të auditimit mund të mos jenë imune nga ky mosbesim në rritje dhe është e rëndësishme të eksplorohet ajo që duhet të bëjmë për të siguruar që të vazhdojmë të jemi Institucion i besuar nga publiku.

4. Si mund të vazhdojnë të vlerësohen Institucionet Supreme të Auditimit si të besueshme?
Rëndësia e Institucionit më të lartë të auditimit është fort e lidhur me besueshmërinë e tij si një Institucion. Pavarësia dhe transparenca e diskutuar më lart, padiskutim që sjellin të dyja besueshmërinë e një Institucioni.

Në përfundim të Konferencës, organizatorët theksuan se sa e rëndësishme është për Institucionet e Auditimit që ta rinovojnë vazhdimisht veten e tyre, në mënyrë që të kenë po atë forcë, pushtet dhe impakt tek palët e tyre të interesit.