Kryetari i KLSH-së, z. Bujar Leskaj, zhvillon një vizitë zyrtare në Zyrën Shtetërore të Auditimit të Republikës së Kroacisë

29.07.2015

Më datat 27 – 28 korrik 2015 Kryetari i KLSH, mori pjesë në një vizitë zyrtare dy ditore pranë Zyrës Shtetërore të Auditimit të Republikës së Kroacisë.

Gjatë kësaj vizite Kryetari i KLSH u takua me homologun e tij kroat, z. Ivan Klesic, pranë selisë së Zyrës Shtetërore të Auditimit, ku kolegët patën rastin të diskutonin edhe më tej intensifikimin e marrëdhënieve dypalëshe. Gjithashtu, Kryetari i KLSH u takua edhe me drejtorët e departamenteve zj. Neda Rogosic, zj. Nada Neda, zj. Lidija Pernan, Asistent Auditues e Përgjithshme dhe z. Kord Kordic Kryeauditues.

Asistent Audituesi i Përgjithshëm dhe drejtuesit e departamenteve të SAI-t Kroat, në nder të delegacionit shqiptar paraqitën disa prezantime në lidhje me karakteristikat dhe veçoritë e Zyrës Shtetërore të Auditimit, si edhe kontekstin ligjor dhe rregullator ku ajo vepron. Në përfundim, z. Bujar Leskaj, i ftuar nga z. Ivan Klesic pati rastin të shkruante disa fjalë në librin e përshtypjeve të insititucionit.

Kontrolli i Lartë i Shtetit ka instaluar tashmë një marrëdhënie të konsoliduar me SAI-n e Kroacisë që prej vitit 2012, kur Kryetari i KLSH nënshkroi një marrëveshje bashkëpunimi me z. Ivan Klesic, Audituesi i Përgjithshëm i SAI-t Kroat.

Një nga produktet konkrete të këtij bashkëpunimi është pjesëmarrja e SAI-t kroat, së bashku me SAI-n e Polonisë, në zbatimin e Projektit IPA, i cili do të fillojë së shpejti implementimin në përfitim të audituesve të Kontrollit të Lartë të Shtetit.

Në vijim të kësaj vizite të shkurtër delegacioni shqiptar, i shoqëruar nga Audituesi i Përgjithshëm i SAI-t Kroat dhe zj. Lidia Prenar, vizitoi selinë e Parlamentit kroat ku edhe u njohën me praktikat e punës, komunikimit e raportimit ndërinstitucional.

Në këtë takim, z. Leskaj shoqërohej nga drejtues dhe auditues të Kontrollit të Lartë të Shtetit, të cilët do ta vizitojnë sërish SAI-n kroat në Shtator të këtij viti, tashmë në kuadrin e një programi intensiv trajnimi me një pjesëmarrje më të gjerë nga kolegët tanë në Kontrollin e Lartë të Shtetit.